أوقات كتير فى الحياة بنحس إننا بنجرى : عايزين نعمل مليون حاجة فى اليوم و مش عارفين حيخلصوا ولا لأ .
جرى جرى جرى و بعدين لما بنخلص و نلاقى نفسنا وقفنا فجأة نستغرب و نقول طب و بعدين ؟
عادة" الاجابة بتكون إن اللى نعرفه أحسن من اللى منعرفهوش يعنى نكمل جرى أحسن ،فتلاقى حد مثلا"قدام التليفزيون يجرى من برنامج لفيلم لأغنية لحد ما يحس إنه استوى فيتقلب و ينام .
أنا عارفة ده عشان أنا كده .
بس اكتشفت الحل و هو ببساطة الهدوء .
أحلى حاجة بعد يوم شغل و دروس و مذاكرة و facebook :)إنى آخد بعضى و أدخل أوضتى أطفى النور و أقعد أقرا مثلا رواية أو أسمع مزيكا هادية أو قرآن أو انى أفضل مبحلقة فى السقف مبعملش أى حاجة بس بفكر فى أكتر حاجة غريبة عليا أكتر حاجة عمرى ما فكرت فيها أبدا أكتر حاجة بعيدة عن روتين حياتى !
أحلى حاجة فى الدنيا انى أقعد أدردش شوية مع نفسى عشان ساعات بتكون واحشانى قوى فى وسط كل الجرى .
ليست هناك تعليقات:
إرسال تعليق